Ye To Nahin Ki Tum Se Mohabbat Nahin Mujhe

غزل

یہ تو نہیں کہ تم سے محبت نہیں مجھے
اتنا ضرور ہے کہ شکایت نہیں مجھے

میں ہوں کہ اشتیاق میں سر تا قدم نظر
وہ ہیں کہ اک نظر کی اجازت نہیں مجھے

آزادئی گناہ کی حسرت کے ساتھ ساتھ
آزادئی خیال کی جرأت نہیں مجھے

دوبھر ہے گرچہ جور عزیزاں سے زندگی
لیکن خدا گواہ شکایت نہیں مجھے

جس کا گریز شرط ہو تقریب دید میں
اس ہوش اس نظر کی ضرورت نہیں مجھے

جو کچھ گزر رہی ہے غنیمت ہے ہم نشیں
اب زندگی پہ غور کی فرصت نہیں مجھے

میں کیوں کسی کے عہد وفا کا یقیں کروں
اتنی شدید غم کی ضرورت نہیں مجھے

سجدے مرے خیال جزا سے ہیں ماورا
مقصود بندگی سے تجارت نہیں مجھے

میں اور دے سکوں نہ ترے غم کو زندگی
ایسی تو زندگی سے محبت نہیں مجھے

احسانؔ کون مجھ سے سوا ہے مرا عدو
اپنے سوا کسی سے شکایت نہیں مجھے

Ghazal
Ye To Nahin Ki Tum Se Mohabbat Nahin Mujhe
Itna zarur hai ki shikayat nahin mujhe

Main hun ki ishtiyaq mein sar-ta-qadam nazar
Wo hain ki ek nazar ki ijazat nahin mujhe

Aazadi-e-gunah ki hasrat ke sath sath
Aazadi-e-khayal ki jurat nahin mujhe

Dubhar hai garche jaur-e-azizan se zindagi
Lekin khuda-gawah shikayat nahin mujhe

Jis ka gurez shart ho taqrib-e-did mein
Is hosh is nazar ki zarurat nahin mujhe

Jo kuchh guzar rahi hai ghanimat hai ham-nashin
Ab zindagi pe ghaur ki fursat nahin mujhe

Main kyun kisi ke ahd-e-wafa ka yaqin karun
Itni shadid gham ki zarurat nahin mujhe

Sajde mere khayal-e-jaza se hain mawara
Maqsud bandagi se tijarat nahin mujhe

Main aur de sakun na tere gham ko zindagi
Aisi to zindagi se mohabbat nahin mujhe

‘Ehsan’ kaun mujh se siwa hai mera adu
Apne siwa kisi se shikayat nahin mujhe