hai aap ke honton pe jo muskan waghaira
qurban gae us pe dil o jaan waghaira
billi to yunhi muft mein badnam hui hai
thaile mein to kuchh aur tha saman waghaira
be-hirs-o-gharaz qarz ada kijiye apna
jis tarah police karti hai chaalan waghaira
ab hosh nahin koi ki baadam kahan hai
ab apni hatheli pe hain dandan waghaira
kis naz se wo nazm ko kah dete hain nasri
jab us ke khata hote hain auzan waghaira
jamhuriyat ek tarz-e-hukumat hai ki jis mein
ghodon ki tarah bikte hain insan waghaira
har shirt ki bushirt bana dali hai ‘anwar’
yun chaak kiya hum ne gareban waghaira