Wida Yaar Ka Lamha Thehar Gaya Mujh Mein
Mein khud to zinda raha waqt mar gaya mujh mein
Sukut sham mein cheekhen sunai deti hain
Tou jatay jatay ajab shore bhar gaya mujh mein
Woh pehle sirf meri aankh mein samaya tha
Phir aik roz ragon tak utar gaya mujh mein
Kuch aise dhayan mein chehra tera tulu howa
Gharob sham ka manzar nikhar gaya mujh mein
Mein uss ki zaat se munkir tha aur phir ik din
Woh apne hone ka ilan kar gaya mujh mein
Khandhar samjh ke meri seer karne aaya tha
Gaya to mausam gham phool dhar gaya mujh mein
Gali mein goonji khamoshi ki cheekh raat ke waqt
Tumhari yaad ka bacha sa dar gaya mujh mein
Bata mein kia karon dil naam ke uss aangan ka
Teri umeed peh jo saj sanwar gaya mujh mein
Yeh apne apne muqaddar ki baat hai faris
Mein uss mein simta raha woh bikhar gaya mujh mein
Wida yaar ka lamha thehar gaya mujh mein
Mein khud to zinda raha waqt mar gaya mujh mein
غزل
وداع یار کا لمحہ ٹھہر گیا مجھ میں
میں خود تو زندہ رہا وقت مر گیا مجھ میں
سکوت شام میں چیخیں سنائی دیتی ہیں
تو جاتے جاتے عجب شور بھر گیا مجھ میں
وہ پہلے صرف مری آنکھ میں سمایا تھا
پھر ایک روز رگوں تک اُتر گیا مجھ میں
کچھ ایسے دھیان میں چہرہ ترا طلوع ہوا
غروب شام کا منظر نکھر گیا مجھ میں
میں اس کی ذات سے منکر تھا اور پھر اک دن
وہ اپنے ہونے کا اعلان کر گیا مجھ میں
کھنڈر سمجھ کے مری سیر کرنے آیا تھا
گیا تو موسم غم پھول دھر گیا مجھ میں
گلی میں گونجی خموشی کی چیخ رات کے وقت
تمہاری یاد کا بچہ سا ڈر گیا مجھ میں
بتا میں کیا کروں دل نام کے اُس آنگن کا
تری اُمید پہ جو سج سنور گیا مجھ میں
یہ اپنے اپنے مقدر کی بات ہے فارس
میں اُس میں سمٹا رہا وہ بکھر گیا مجھ میں
وداع یار کا لمحہ ٹھہر گیا مجھ میں
میں خود تو زندہ رہا وقت مر گیا مجھ میں
