Garmi-E-Hasrat-E-Nakaam Se Jal Jate Hain

Ghazal

Garmi-E-Hasrat-E-Nakaam Se Jal Jate Hain

hum charaghon ki tarah sham se jal jate hain

shama jis aag mein jalti hai numaish ke liye

hum usi aag mein gumnam se jal jate hain

bach nikalte hain agar aatish-e-sayyal se hum

shola-e-ariz-e-gulfam se jal jate hain

KHud-numai to nahin shewa-e-arbab-e-wafa

jin ko jalna ho wo aaram se jal jate hain

rabt-e-baham pe hamein kya na kahenge dushman

aashna jab tere paigham se jal jate hain

jab bhi aata hai mera nam tere nam ke sath

jaane kyun log mere nam se jal jate hain