Agarchay Aaina Dil Mein Hai Qiyam Uska

Agarchay Aaina Dil Mein Hai Qiyam Uska
Nah koi shakal hai iss ki nah koi naam uska

Wohi khuda kabhi milwaye ga hamein uss se
Jo intezar karata hai subah-o-sham uska

Hamare saath nahi ja saka tha woh lekin
Raha khayal siyahat mein gaam gaam uska

Khuda ko pyaar hai apne har aik bande se
Sufaid fam hai iss ka siyah fam uska

Kama ke dete hain jo mal woh ameeron ko
Hisab kyun nahi lete kabhi awam uss ka

Hamara farz hai be lag raye ka izhar
Koi durust kahe ya ghalat yeh kaam uska

Kahan hai sheikh ko sudh budh mazeed peene ki
Nasha utar gaye teen char jaam uska

Zuban dil se koi shayari sonata hai
Tou sameen bhulate nahi kalam uss ka

Shaoor sab se alag bethta hai mehfil mein
Usi se aap samjh lejiye maqam uska

Agarchay aaina dil mein hai qiyam uska
Nah koi shakal hai iss ki nah koi naam uska