Tum Aa Gaye Ho To Kyun Intezar-E-Sham Karen

Ghazal
Tum Aa Gaye Ho To Kyun Intezar-E-Sham Karen

Kaho To Kyun Na Abhi Se Kuch Ehtimam Karen

Khulus-O-Mehr-O-Wafa Log Kar Chuke Hain Bahut

Mere Khayal Mein Ab Aur Koi Kaam Karen

Ye Khas-O-Aam Ki Be-Kar Guftugu Kab Tak

Qubul Kijiye Jo Faisla Awam Karen

Har Aadmi Nahi Shaista-E-Rumuz-E-Sukhan

Wo Kam-Sukhan Ho Mukhatab To Ham-Kalam Karen

Juda Hue Hain Bahut Log Ek Tum Bhi Sahi

Ab Itni Baat Pe Kya Zindagi Haram Karen

Khuda Agar Kabhi Kuch Ikhtiyar De Hum Ko

Tu Pahle Khak-Nashinon Ka Intizam Karen

Rah-E-Talab Mein Jo Gumnam Mar Gae ‘Nasir’

Mata-E-Dard Unhi Sathiyon Ke Nam Karen