Sab Kuch Hote Bik Jate Hain Log Yeh Kaise Bik Jatay Hain
Totay tou wo ghar, ghar nahi rehta , sab ke hissay bik jatay hain

غزل

سب کچھ ہوتے بِک جاتے ہیں لوگ یہ کیسے بِک جاتے ہیں
ٹوٹے تو وہ گھر گھر نہیں رہتا ، سب کے حصے بِک جاتے ہیں

وقت ٗپڑے تو دیکھا ہم نے ،بیچنے والے بِک جاتے ہیں
سچ تو پھر سچ رہتا ہے لکھنے والے لکھ جاتے ہیں

کون خریدے اُن کے غم کو جن کے بچے بِک جاتے ہیں
محنت کش کے ہاتھ بِکے تو خواب بھی اُس کے بِک جاتے ہیں

بات تو ساری قیمت کی ہے اچھے اچھے بِک جاتے ہیں
کیا کیا مہنگے لوگ جہاں پر ،کتنے سستے بِک جاتے ہیں

بچے اُن کو چھو نہیں پاتے اور کھلونے بِک جاتے ہیں
سچ کا گاہک اک بھی نہیں ہے لاکھوں دھوکے بِک جاتے ہیں

دیواریں دروازے کیا ہیں گھر کے نقشے بِک جاتے ہیں
امؔجد جن کو بِکنا ہو وہ کسی بہانے بِک جاتے ہیں