شاعر: احمد ندیم قاسمی
قلم دل میں ڈبویا جا رہا ہے
نیا منشور لکھا جا رہا ہے
میں کشتی میں اکیلا تو نہیں ہوں
مرے ہم راہ دریا جا رہا ہے
سلامی کو جھکے جاتے ہیں اشجار
ہوا کا ایک جھونکا جا رہا ہے
مسافر ہی مسافر ہر طرف ہیں
مگر ہر شخص تنہا جا رہا ہے
میں اک انساں ہوں یا سارا جہاں ہوں
بگولہ ہے کہ صحرا جا رہا ہے
ندیمؔ اب آمد آمد ہے سحر کی
ستاروں کو بجھایا جا رہا ہے
Qalam Dil Mein Duboya Ja Raha Hai
naya manshur likkha ja raha hai
 
main kashti mein akela to nahin hun
mere hamrah dariya ja raha hai
 
salami ko jhuke jate hain ashjar
hawa ka ek jhonka ja raha hai
 
musafir hi musafir har taraf hain
magar har shakhs tanha ja raha hai
 
main ek insan hun ya sara jahan hun
bagula hai ki sahra ja raha hai
 
‘nadim’ ab aamad aamad hai sahar ki
sitaron ko bujhaya ja raha hai
Share this with your friends