Budhy Baloch Ki Naseehat Bety Ko

Nazam:Budhy Baloch Ki Naseehat Bety Ko

Ho Tere Bayaban Ki Hawa Tujh Ko Gawara

Iss Dasht Se Behter Hai Na Dilli Na Bukhara

Jis Simat Mein Chahe Sifat-e-Seel-e-Rawan Chal

Wadi Ye Humari Hai, Woh Sehra Bhi Humara

Ghairat Hai Bari Cheez Jahan-e-Tagg-o-Dou Mein

Pehnati Hai Darvesh Ko Taj-e-Sar-E-Dara

Hasil Kisi Kamil Se Ye Poshida Hunar Kar

Kehte Hain Ke Sheeshe Ko Bana Sakte Hain Khara

Afrad Ke Hathon Mein Hai Aqwam Ki Taqdeer

Har Fard Hai Millat Ke Muqaddar Ka Sitara

Mehroom Raha Doulat-e-Darya Se Woh Ghawwas

Karta Nahin Jo Souhbat-e-Sahil Se Kinara

Deen Hath Se De Kar Agar Azad Ho Millat

Hai Aesi Tajarat Mein Musalman Ka Khasara

Dunya Ko Hai Phir Ma’arka-e-Rooh-o-Badan Paish

Tehzeeb Ne Phir Apne Darindon Ko Ubhara

Allah Ko Pa-Mardi-e-Momin Pe Bharosa

Iblees Ko Yourap Ki Machinon Ka Sahara

Taqdeer-e-Umam Kya Hai, Koi Keh Nahin Sakta

Momin Ki Firasat Ho To Kafi Hai Ishara

Ikhlas-e-Amal Mang Nayagan-e-Kuhan Se

Shahan Che Ajab Gar Banawazand Gada Ra