Tumhare Liye Khat
Yeh jo daman e umar mein chand saansein bachi hain
Mujhe tootti si nazar aa rahi hain

Tumhain es ki koi zarorat nahi
Phir bhi es khat mein apne sabhi paasword
Aur ghar ka pta lekh rahi hoon

Agar tum mere bad aao
To ghar ki ronaq se ho kar
Zara mere veeran kamre mein jana

Wahaan rakhi aik almari ke aik khane
Mein kuch falsafy ki kitabon ke piche

Haray rang ka folder dekh lena
Usay kholna us mein barson purane

Tumhare sabhi khat paray hain
Khaton mein wo mohsin ki nazmein
Teri jheel se aankhon mein ratjagon ke bhawanr
Aur meri soch ke gehre pani mein

Aur faiz ki wo ghazal….. Kaise thi?
Haan……. Naseeb azmane ke din aa rahe hain

Udher folder se paray dayen janib register para hai
Wohi jis mein “abdil” ke baray
Mein tum ne kahani lekhi thi

Kahani ke safhoon mein gajray
“Jo ab surmi ho gay hain” paray hain

Kahin phool ki patiyaan bhi pari hain
Isi mein kahin tooti mala ke mouti hain
Maala mein ne pehni nahi thi
To phir kaise tooti?

Agar yaad aaya to yeh lekhon gi
Wahin piche ek TCS ka bara sa bara sa jo daba para hai

Wahaan satrha rangon ke wo chhoriyan hain
Keh jab mein ne aik din kaha tha

Mujhe bujh lagti hain
Aur tum ne aglay hi din baich di theen

Usay kholana mat keh wo tum se sharminda hoon gi
Kabhi mein ne pehni nahi

Kyun keh wada yahi tha keh tum apne hathon se
Aur haan!!!
Wahin aik khaki lifafa para hai
Meri ibtadai dino ki sabhi shayari
Es mein bikhri pari hai

Wo nazmein jinhain phone per sun kar hanstay thay tum
Aur wo ghazalain jin mein ghalat qafiye thay
Abhi tak ghalat hain

Yeh sab mein ne dil se laga kar rakha hai
Mere hath per hath rakho zara
Aur yeh wada karo

Tum yeh sab apne dil se laga kar rakho gay
Tumhain aakhri baar ji bhar ke dekhon

Yeh ji chahata hai ! magar meri jaan
Ab yeh mumkin nahi hai

Tumhain yaad hai na keh do saal pehle
December ki wo aathyen shaam thi
Tumhare Liye Khat