شاعر:انور شعور
غزل
گھروں میں سوتے سوتے لوگ ہر رات اٹھنے لگتے ہیں
تو آبادی میں کیا کیا انقلابات اٹھنے لگتے ہیں

نہیں اٹھتے اگر سوئے ہوئے سلطان تو اک دن
جو قابو میں نہیں آتے وہ حالات اٹھنے لگتے ہیں

جواب آنے میں لگ جاتی ہیں اکثر مدتیں لیکن
جواب آتے ہی سر میں پھر سوالات اٹھنے لگتے ہیں

وہ کرتا ہے نہایت بادل نا خواستہ رخصت
جب اس کے پاس سے ہم بے مدارات اٹھنے لگتے ہیں

کوئی صدمہ نہیں اٹھتا شروع عشق میں تاہم
بتدریج آدمی سے سارے صدمات اٹھنے لگتے ہیں

شعورؔ اپنے لبوں پر تم خوشی سے مہر لگنے دو
دبانے سے تو افکار و خیالات اٹھنے لگتے ہیں
Ghazal
Gharon Mein Sote Sote Log Har Raat Uthne Lagte Hain
To aabaadi mein kya kya inqilabaat uthne lagte hain

Nahin uthte agar soe hue sultan to ek din
Jo qabu mein nahin aate wo haalat uthne lagte hain

Jawab aane mein lag jati hain aksar muddaten lekin
Jawab aate hi sar mein phir sawalat uthne lagte hain

Wo karta hai nihayat ba-dil-e-na-khwasta rukhsat
Jab us ke pas se hum be-mudaraat uthne lagte hain

Koi sadma nahin uthta shuru-e-ishq mein taham
Ba-tadrij aadmi se sare sadmat uthne lagte hain

‘Shuur’ apne labon par tum khushi se muhr lagne do
Dabane se to afkar-o-khayalat uthne lagte hain
Share this with your friends