شاعر: فیض احمد فیض

آئے کچھ ابر کچھ شراب آئے
اس کے بعد آئے جو عذاب آئے

بام مینا سے ماہتاب اترے
دست ساقی میں آفتاب آئے

ہر رگ خوں میں پھر چراغاں ہو
سامنے پھر وہ بے نقاب آئے

عمر کے ہر ورق پہ دل کی نظر
تیری مہر و وفا کے باب آئے

کر رہا تھا غم جہاں کا حساب
آج تم یاد بے حساب آئے

نہ گئی تیرے غم کی سرداری
دل میں یوں روز انقلاب آئے

جل اٹھے بزم غیر کے در و بام
جب بھی ہم خانماں خراب آئے

اس طرح اپنی خامشی گونجی
گویا ہر سمت سے جواب آئے

فیضؔ تھی راہ سر بسر منزل
ہم جہاں پہنچے کامیاب آئے

aaye kuchh abr kuchh sharab aaye

is ke baad aae jo azab aaye

baam-e-mina se mahtab utre

dast-e-saqi mein aaftab aaye

har rag-e-khun mein phir charaghan ho

samne phir wo be-naqab aaye

umr ke har waraq pe dil ki nazar

teri mehr-o-wafa ke bab aaye

kar raha tha gham-e-jahan ka hisab

aaj tum yaad be-hisab aaye

na gai tere gham ki sardari

dil mein yun roz inqalab aaye

jal uthe bazm-e-ghair ke dar-o-baam

jab bhi hum khanuman-kharab aaye

is tarah apni khamushi gunji

goya har samt se jawab aaye

‘faiz’ thi rah sar-ba-sar manzil

hum jahan pahunche kaamyab aaye