aaye kuchh abr kuchh sharab aaye

is ke baad aae jo azab aaye

baam-e-mina se mahtab utre

dast-e-saqi mein aaftab aaye

har rag-e-khun mein phir charaghan ho

samne phir wo be-naqab aaye

umr ke har waraq pe dil ki nazar

teri mehr-o-wafa ke bab aaye

kar raha tha gham-e-jahan ka hisab

aaj tum yaad be-hisab aaye

na gai tere gham ki sardari

dil mein yun roz inqalab aaye

jal uthe bazm-e-ghair ke dar-o-baam

jab bhi hum khanuman-kharab aaye

is tarah apni khamushi gunji

goya har samt se jawab aaye

‘faiz’ thi rah sar-ba-sar manzil

hum jahan pahunche kaamyab aaye