شاعر:محسن نقوی
مرے لیے کون سوچتا ہے
جدا جدا ہیں مرے قبیلے کے لوگ سارے
جدا جدا سب کی صورتیں ہیں

 

سبھی کو اپنی انا کے اندھے کنویں کی تہ میں پڑے ہوئے
خواہشوں کے پنجر
ہوس کے ٹکڑے
حواس ریزے
ہراس کنکر تلاشنا ہیں

سبھی کو اپنے بدن کی شہ رگ میں
قطرہ قطرہ لہو کا لاوا انڈیلنا ہے

سبھی کو گزرے دنوں کے دریا کا دکھ
وراثت میں جھیلنا ہے

مرے لئے کون سوچتا ہے
سبھی کی اپنی ضرورتیں ہیں

مری رگیں چھلتی جراحت کو کون بخشے
شفا کی شبنم
مری اداسی کو کون بہلائے

کسی کو فرصت ہے مجھ سے پوچھے
کہ میری آنکھیں گلاب کیوں ہیں

مری مشقت کی شاخ عریاں پر
سازشوں کے عذاب کیوں ہیں

مری ہتھیلی پہ خواب کیوں ہیں
مرے سفر میں سراب کیوں ہیں

مرے لیے کون سوچتا ہے
سبھی کے دل میں کدورتیں ہیں
Mere Liye Kaun Sochta Hai
juda juda hain mere qabile ke log sare
juda juda sab ki suraten hain

sabhi ko apni ana ke andhe kuen ki tah mein pade hue
khwahishon ke pinjar
hawas ke Tukde
hawas reze
hiras kankar talashna hain

sabhi ko apne badan ki shah-e-rag mein
qatra qatra lahu ka lawa undelna hai

sabhi ko guzre dinon ke dariya ka dukh
wirasat mein jhelna hai

mere liye kaun sochta hai
sabhi ki apni zaruraten hain

meri ragen chhilti jarahat ko kaun bakhshe
shifa ki shabnam
meri udasi ko kaun bahlae

kisi ko fursat hai mujh se puchhe
ki meri aankhen gulab kyun hain

meri mashaqqat ki shakh-e-uriyan par
sazishon ke azab kyun hain

meri hatheli pe khwab kyun hain
mere safar mein sarab kyun hain

mere liye kaun sochta hai
sabhi ke dil mein kuduraten hain
Share this with your friends