Wehshat-E-Dil Ko Reh-E-Sabar Peh Lanay Walay

Wehshat-E-Dil Ko Reh-E-Sabar Peh Lanay Walay
Aye khuda jeetay rahen shair sunane walay

Faida dhoodnay walon se ulajh parte hain
Hum tere hejr mein nuqsaan uthane walay

Ek jagah ruk zamen aur utarnay de mujhe
Kurrah-e-arz ko tezi se ghumanay walay

Ab to pewand hain baqi nah nishan, dekh to lo
Yunhi bare aaye mera zakhm dukhane walay

Khush mujhe dekh ke afsurda howa acha hai
Qehqehay thay hi mere aag laganay walay

Woh mera rab hai jo ghafar bhi rehman bhi hai
Aye mujhe khauf zada karne daranay walay

Teri khwahish hai agar tark-e-talluq to baja
Hum to har hal mein hain sath nibhanay walay

Weshat-e-dil ko reh-e-sabar peh lanay walay
Aye khuda jeetay rahen shair sunane walay