نظم
عشق سنت ہے خدا کی، عشق میراثِ ازل
عشق کا بانی مُبانی، لاؒ یمُوتُ ولَم یزل

عشق تنہائی پسند از روزِ اوّل تا ابد
عشق یکتائی کا طالب، لَم یلد سے لَم یُولَد

عشق نے چاہا کہ اب ہو دل لگی کا بندوبست
عشق کی تحریک پر برپا ہوا یومِ الست

عشق آدم کا حوالا، عشق حوا کا وجود
عشق ہی ہر ہست و بوُد باعثِ ہر ہست و بود

عشق نے پیدا کیا ہابیل میں ایمانِ روح
عشق نے ہی آکے ٹالا نوح سے طوفانِ نوح

عشق کوہ ثورو جودی، عشق ہی اوجِ حِرا
عشق کوہِ طورِ سینا، عشق مروہ و صفا

عشقِ ابراہیم سے سوزاں نہیں تھی کوئی آگ
عشق نے داؤد کو چھیڑا تو چھڑے اُس نے راگ

عشق میں بیٹے پر جب خنجر اُٹھاتا ہے خلیل
عشق میں سر کو جھکا دے ہنس کے فرزندِ جلیل
عشق نے زم زم نکالے جب بھی رگڑی ایڑیاں
عشق نے زندان میں یوسف کی کھولی بیڑیاں
عشق مریم کی صداقت، عشق رنجِ ہاجرہ
عشق ہی ملکہ سبا و آسیہ کا ماجرا
عشق بن کر صبر جھلکا شکل میں ایوب کی
عشق بن کر اشک ٹپکا آنکھ سے یعقوب کی
عشق کے صدقے سنی رب نے دعائے زکریا
عشق پر چوبیس گھنٹے سایہ ہائے کبریا
عشق میں سنیاس لے کر بادشاہ ہوتے ہیں بدھ
عشق اک نظر کرم سے کر دے ناپاکوں کو شُدھ
عشق نے فرعون کے دربار میں کلمہ پڑھا
عشق کربلا میں تنہا سو یزیدوں سے لڑا
عشق نے ہو کر عصا دریا کے دو حصے کیے
عشق نے ہی چاند کے انگلی سے دو ٹکڑے کیے
عشق کی معراج کے آگے ہیں کیا ہفت آسماں
عشق تو افلاک کو سمجھے ہے کویا پائداں
عشق عکسِ مصطفٰیﷺ ہے عشق عیسٰی کی شبیہ
عشق قرآنِ محمدﷺ عشق انجیلِ مسیح
عشق، صحفِ ابراہیم و موسیٰ و دیگر رُسُل
عشقِ کُل لیکن وہی جو لائے ہیں مولائے کُل
عشق ہے شِعب ابی طالب کے پورے تین سال
عشق ہے عمار و یاسر، عشق حمزہ و بلال
عشق نے ساتھی بنایا دل کو، دشمن عقل کو
عشق نے مڑ کر کبھی دیکھا نہ صورت شکل کو
عشق یارِ یونس و اصحابِ کہف دیندار
عشق سب کا کارساز و عیب پوش و کردگار
عشق جن کو بھی ہوا کہتے رہے وہ بل الیقین
عشق ہے کافی ہمیں واللہ خیر الرازقین
عشق کے اے دشمنو! تم لاکھ لے آؤ تفنگ
عشق ہو تو جیتتے ہیں تین سو تیرہ بھی جنگ
عشق چاہے تو سُراقہ کے جگا دے سوئے بخت
عشق پل میں روند ڈالے قیصر و کسریٰ کے تخت
عشق والوں کا ہمیشہ ہی رہا لشکر قلیل
عشق چن کر مارتا ہے آج بھی اصحاب فیل
عشق ہی اصحاب صفہ کی مصمم مخلصی
عشق ہے قرآن کے ستّر حافظوں کی بے بسی
عشق کے دشمن ہیں ابلیس و ابو جہل و لہب
عشق پروردِگار اور مخالف سب کے سب
عشق ہے فرعون اور نمرود کے جذبوں کی ضد
عشق کی نشوونما میں میرے جیسے متحد
عشق فتح بدر و خیبر خندق و جنگِ حنین
عشق کے مفتوح خطّے مشرقین و مغربین
عشق ہے صدیق اور خطّاب ہے جس کا خِطاب
عشق ذوالنورین ہے اور عشق عشقِ بو تراب
عشق نے نفرت زدوں کی نیندیں کر ڈالی حرام
عشق نے کی روم اور فارس کی سرکاریں دھڑام
عشق میں وہ کون ہیں دو بادشاہانِ ولی
عشق ہے یا تو حسن، یا پھر حسین ابنِ علی
عشقِ خاکی وہ ہے جس کا نام صادق اور امین
عشقِ نوری وہ کہ جو ہے رحمت اللعالمین
عشق دو عشقوں پہ کرتا ہے ہمیشہ اکتفا
عشق ہے عشقِ حقیقی یا ہے عشقِ مصطفٰی(ﷺ)