Naqaab Urra To Mujhe Surkh Lab Dikhayi Diye

Naqaab Urra To Mujhe Surkh Lab Dikhayi Diye
Woh do diye jo hawa ke sabab dikhayi diye

Mein juzwi andha tha do char rang dikhte thay
Jab uss ne mujh se kaha dekh sab dikhayi diye

Kisi ke saath kisi bagh mein teheltay hoye
Tamam phool bohat baa adab dikhayi diye

Khala mein ghoorun tu jo chehre bannay lagte hain
Pataa nahi yeh kahan aur kab dikhayi diye

Dabay hoye thay kai khwab aansowon ke talay
Mein ro ke soya hoon ik sham tab dikhayi diye

Nazar jhuki hi nahi iss se qabal herat hai
Keh uss ke paon bicharnay ki shab dikhayi diye

Safar mein janaa mere dost woh nahi jo lagay
Nazar to aatay thay har roz ab dikhayi diye

Ajab ujaar jazeeron ki simt aa gaya hoon
Mujhe laga tha kinaray hain jab dikhayi diye

Naqaab urra tu mujhe surkh lab dikhayi diye
Woh do diye jo hawa ke sabab dikhayi diye