شاعر: فیض احمد فیض

نہیں نگاہ میں منزل تو جستجو ہی سہی
نہیں وصال میسر تو آرزو ہی سہی

نہ تن میں خون فراہم نہ اشک آنکھوں میں
نماز شوق تو واجب ہے بے وضو ہی سہی

کسی طرح تو جمے بزم مے کدے والو
نہیں جو بادہ و ساغر تو ہاؤ ہو ہی سہی

گر انتظار کٹھن ہے تو جب تلک اے دل
کسی کے وعدۂ فردا کی گفتگو ہی سہی

دیار غیر میں محرم اگر نہیں کوئی
تو فیضؔ ذکر وطن اپنے روبرو ہی سہی

nahin nigah mein manzil to justuju hi sahi

nahin visal mayassar to aarzu hi sahi

na tan mein khun faraham na ashk aankhon mein

namaz-e-shauq to wajib hai be-wazu hi sahi

kisi tarah to jame bazm mai-kade walo

nahin jo baada-o-saghar to haw-hu hi sahi

gar intizar kathin hai to jab talak ai dil

kisi ke wada-e-farda ki guftugu hi sahi

dayar-e-ghair mein mahram agar nahin koi

to ‘faiz’ zikr-e-watan apne ru-ba-ru hi sahi