Hum Apne Raftagaan Ko Yaad Rakhna Chahte Hain

Hum Apne Raftagaan Ko Yaad Rakhna Chahte Hain
Dilon ko dard se abaad rakhna chahte hain

Mubaada mundamil zakhmon ki surat bhul hi jayen
Abhi kuch din ye ghar barbaad rakhna chahte hain

Bohat ronaq thi un ke dam qadam se shahr-e-jaan mein
Wahi ronaq hum un ke baad rakhna chahte hain

Bohat mushkil zamanon mein bhi hum ahl-e-mohabbat
Wafa par ishq ki bunyaad rakhna chahte hain

Saron mein ek hi soda keh lau dene lage khak
Umiden hasb-e-istidaad rakhna chahte hain

Kahin aisa na ho harf-e-dua mafhoom kho de
Dua ko surat-e-Faryaad rakhna chahte hain

Qalam aaloda nan-o-namak rahta hai phir bhi
Jahan tak ho sake aazad rakhna chahte hain

Hum apne raftagaan ko yaad rakhna chahte hain
Dilon ko dard se abaad rakhna chahte hain