Basharat Ho Keh Ab Mujh Sa Koi Pagal

Basharat Ho Keh Ab Mujh Sa Koi Pagal Nah Aaye Ga
Yeh daur aakhir deewangi hai beet jayega

Kisi ki zindagi zayaa nah hogi ab mohabbat mein
Koi dhoka nah de ga ab koi dhoka nah khaye ga

Nah ab utray ga qudsi koi insaano ki basti par
Nah ab jungle mein charwaha koi bheerein charaye ga

Giroh ibn aadam lakh bhatkay lakh sar patkay
Ab iss andar se koi rasta bahir nah jaye ga

Bashar ko dekh kar be inteha afsoos aata hai
Nah maloom uss kharabati ko kis din hosh aaye ga

Mita bhi de mujhe ab aa musawwir ta bah ke aakhir
Banaye ga bigare ga bigare ga banaye ga

Mohabbat bhi kahin aye dost tardeedon se chhupti hai
Kisay qayal kare ga tou kisay bawar karaye ga

Ghanemat jaan agar do bol bhi kanon mein par jayen
Keh phir yeh bolne wala nah roye ga nah gaye ga

Shaoor aakhir usay hum se ziyada jante ho tum
Bohat seedha sahi lekin tumhein tou bech khaye ga

Basharat ho keh ab mujh sa koi pagal nah aaye ga
Yeh daur aakhir deewangi hai beet jayega