Apni Tanhai Mere Naam Peh Aabad Kare
Kon hoga jo mujhe uss ki tarah yad kare

Dil ajab shahr keh jis par bhi khula dar uss ka
Woh musafir usay har simt se barbaad kare

Apne qatil ki zehanat se parishan hoon mein
Rooz ik mout naye tarz ki ijad kare

Itna heraan ho meri be talbi ke aagay
Wa qafas mein koi dar khud mera Sayyad kare

Salab benaai ke ahkam mile hain jo kabhi
Roshni choone ki khwahish koi shab zad kare

Soch rakhna bhi jarayam mein hai shamil ab to
Wohi masoom hai har baat peh jo saad kare

Jab lahoo bol pare uss ki gawahi ke khilaf
Qazi-e-shahr kuchh uss bat mein irshad kare

Uss ki miti mein bohat rooz raha mere wajood
Mere sahir se kaho ab mujhe aazad kare

Apni tanhai mere naam peh aabad kare
Kon hoga jo mujhe uss ki tarah yad kare