نظم

آج کی شب تو کسی طور گزر جائے گی

رات گہری ہے مگر چاند چمکتا ہے ابھی

میرے ماتھے پہ ترا پیار دمکتا ہے ابھی

میری سانسوں میں ترا لمس مہکتا ہے ابھی

میرے سینے میں ترا نام دھڑکتا ہے ابھی

زیست کرنے کو مرے پاس بہت کچھ ہے ابھی

تیری آواز کا جادو ہے ابھی میرے لیے

تیرے ملبوس کی خوشبو ہے ابھی میرے لیے

تیری بانہیں ترا پہلو ہے ابھی میرے لیے

سب سے بڑھ کر مری جاں تو ہے ابھی میرے لیے

زیست کرنے کو مرے پاس بہت کچھ ہے ابھی

آج کی شب تو کسی طور گزر جائے گی!

آج کے بعد مگر رنگ وفا کیا ہوگا

عشق حیراں ہے سر شہر صبا کیا ہوگا

میرے قاتل ترا انداز جفا کیا ہوگا!

آج کی شب تو بہت کچھ ہے مگر کل کے لیے

ایک اندیشۂ بے نام ہے اور کچھ بھی نہیں

دیکھنا یہ ہے کہ کل تجھ سے ملاقات کے بعد

رنگ امید کھلے گا کہ بکھر جائے گا

وقت پرواز کرے گا کہ ٹھہر جائے گا

جیت ہو جائے گی یا کھیل بگڑ جائے گا

خواب کا شہر رہے گا کہ اجڑ جائے گا

Nazam

Aaj Ki Shab To Kisi Taur Guzar Jaegi

Raat gahri hai magar chand chamakta hai abhi

Mere mathe pe tera pyar damakta hai abhi

Meri sanson mein tera lams mahakta hai abhi

Mere sine mein tera nam dhadakta hai abhi

Zist karne ko mere pas bahut kuchh hai abhi

Teri aawaz ka jadu hai abhi mere liye

Tere malbus ki khushbu hai abhi mere liye

Teri banhen tera pahlu hai abhi mere liye

Sab se badh kar meri jaan tu hai abhi mere liye

Zist karne ko mere pas bahut kuchh hai abhi

Aaj ki shab to kisi taur guzar jaegi!

Aaj ke baad magar rang-e-wafa kya hoga

Ishq hairan hai sar-e-shahr-e-saba kya hoga

Mere qatil tera andaz-e-jafa kya hoga!

Aaj ki shab to bahut kuchh hai magar kal ke liye

Ek andesha-e-be-nam hai aur kuchh bhi nahin

Dekhna ye hai ki kal tujh se mulaqat ke baad

Rang-e-ummid khilega ki bikhar jaega

Waqt parwaz karega ki thahar jaega

Jit ho jaegi ya khel bigad jaega

Khwab ka shahr rahega ki ujad jaega