غزل

اپنے احساس سے چھو کر مجھے صندل کر دو
میں کہ صدیوں سے ادھورا ہوں مکمل کر دو

نہ تمہیں ہوش رہے اور نہ مجھے ہوش رہے
اس قدر ٹوٹ کے چاہو مجھے پاگل کر دو

تم ہتھیلی کو مرے پیار کی مہندی سے رنگو
اپنی آنکھوں میں مرے نام کا کاجل کر دو

اس کے سائے میں مرے خواب دہک اٹھیں گے
میرے چہرے پہ چمکتا ہوا آنچل کر دو

دھوپ ہی دھوپ ہوں میں ٹوٹ کے برسو مجھ پر
اس قدر برسو مری روح میں جل تھل کر دو

جیسے صحراؤں میں ہر شام ہوا چلتی ہے
اس طرح مجھ میں چلو اور مجھے جل تھل کر دو

تم چھپا لو مرا دل اوٹ میں اپنے دل کی
اور مجھے میری نگاہوں سے بھی اوجھل کر دو

مسئلہ ہوں تو نگاہیں نہ چراؤ مجھ سے
اپنی چاہت سے توجہ سے مجھے حل کر دو

اپنے غم سے کہو ہر وقت مرے ساتھ رہے
ایک احسان کرو اس کو مسلسل کر دو

مجھ پہ چھا جاؤ کسی آگ کی صورت جاناں
اور مری ذات کو سوکھا ہوا جنگل کر دو

Ghazal

Apne Ehsas Se Chhu Kar Mujhe Sandal Kar Do
Main ki sadiyon se adhura hun mukammal kar do

Na tumhein hosh rahe aur na mujhe hosh rahe
Is qadar tut ke chaho mujhe pagal kar do

Tum hatheli ko mere pyar ki mehndi se rango
Apni aankhon mein mere nam ka kajal kar do

Is ke sae mein mere khwab dahak utthenge
Mere chehre pe chamakta hua aanchal kar do

Dhup hi dhup hun main tut ke barso mujh par
Is qadar barso meri ruh mein jal-thal kar do

Jaise sahraon mein har sham hawa chalti hai
Is tarah mujh mein chalo aur mujhe jal-thal kar do

Tum chhupa lo mera dil ot mein apne dil ki
Aur mujhe meri nigahon se bhi ojhal kar do

Masala hun to nigahen na churao mujh se
Apni chahat se tawajjoh se mujhe hal kar do

Apne gham se kaho har waqt mere sath rahe
Ek ehsan karo is ko musalsal kar do

Mujh pe chha jao kisi aag ki surat jaanan
Aur meri zat ko sukha hua jangal kar do