Sab Intezar Mein Thay Kab Koi Zuban Khulay

Sab Intezar Mein Thay Kab Koi Zuban Khulay
Phir uss ke hont khulay aur sab ke kaan khulay

Bhalay ho lakh haseen khawab yaad rehta nahi
Jab aankh darjanoon logon ke darmiyan khulay

Bohat sa len gay karaya zara si dein gay jagah
Yahan ke logon ke dil tang hain maakan khulay

Gaya woh shakhs tu nazren uthayen logon ne
Hawa thami to jahazoon ki badbaan khulay

Hamari aankh mein khaddar ke khawab biktay thay
Tum aaye aur yahan boski ke thaan khulay

Jagah ho iss mein kam az kam mere yaqeen ke liye
Mein chahta hoon keh itna tera gumaan khulay

Yeh kon bhool gaya unn labon ka khaka yahan
Yeh kon chor gaya gar ke martabaan khulay

Sab intezar mein thay kab koi zuban khulay
Phir uss ke hont khulay aur sab ke kaan khulay