Tere Ilaqon Peh Yaar Qabza Bazor E Taqat Nahi Karen Gay
So dil ko jeete baghair tujh per kabhi hakumat nahi karen gay
Rah e talab mein wo dekho hum se faqeer logon ki be niazi
Kisi se ho bhi gai muhabbat, to us ki minnat nahi karen gay
Hamein na hooron se koi matlab, na joye shair o shukar ka lalach
Baghair tere jo mil rahi ho, qabool jannat nahi karen gay
Chalo keh dil ka madina dar khulay do hi ashkon ka muntazir hai
Pada hai aankhon ka khushk makkah, to kia yeh hijrat nahi karen gay
Bhalay tum andar ki nafraton ka yazeed bahir nikaal lao
Hum ahl e dil hain hussain jaise tumhari bait nahi karen gay
Aaye meer jafir tum east india ke chand paison peh bik gay ho
Tumhain yeh doulat to dayen gay lekin tumhari izzat nahi karen gay
Teri muhabbat mein lartay lartay, jo chand aashoq bach gay hain
Yeh muthi bhar hain, qasam khuda ki magar bagawat nahi karen gay
Aur ab tou aakhir mein jaan le le, keh es mein teri hi behtri hai
Jo tere hathon se bach gaye hum to phir rayat nahi karen gaye
Hamara lasha hai sar burida, hamare bazao bhi kat chukay hain
Magar yeh qatil keh hum ko chune ki ab bhi himat nahi karen gay
Esi peh amir ameer o farhad o mujnu ko di gai ijazat
Keh kia karen gaye yeh khaak teeno agar muhabbat nahi karen gay
غزل
تیرے علاقوں پہ یار قبضہ بزورِ طاقت نہیں کرینگے
سو دِل کو جیتے بغیر تجھ پر کبھی حکومت نہیں کریں گے
رہِ طلب میں وہ دیکھو ہم سے فقیر لوگوں کی بے نیازی
کسی سے ہو بھی گئی محبت، تو اُس کی منت نہیں کریں گے
ہمیں نہ حوروں سے کوئی مطلب، نہ جوئے شیر و شکر کا لالچ
بغیر تیرے جو مل رہی ہو، قبول جنّت نہیں کرینگے
چلو کہ دل کا مدینہ دٙر کھولے دو ہی اشکوں کا منتظِر ہے
پڑا ہے آنکھوں کا خشک مکّہ، تو کیا یہ ہجرت نہیں کریں گے
بھلے تم اندر کی نفرتوں کا یزید باہر نکال لاؤ
ہم اہلِ دل ہیں حُسین جیسے، تمہاری بیت نہیں کریں گے
اے میر جعفر تم ایسٹ انڈیا کے چند پیسوں پہ بِک گئے ہو
تمہیں یہ دولت تو دیں گے لیکن تمہاری عزت نہیں کریں گے
تیری محبت میں لڑتے لڑتے، جو چند عُشّاق بچ گئے ہیں
یہ مُٹھّی بھر ہیں، قسم خدا کی مگر بغاوت نہیں کریں گے
اور اب تُو آخر میں جان لے لے، کہ اِس میں تیری ہی بہتری ہے
جو تیرے ہاتھوں سے بچ گئے ہم تو پھر رعایت نہیں کریں گے
ہمارا لاشہ ہے سٙر بُریدہ، ہمارے بازو بھی کٹ چکے ہیں
مگر یہ قاتل کہ ہم کو چھونے کی اب بھی ہمّت نہیں کریں گے
اسی پہ عامِر امیر و فرہاد و مجنوں کو دی گئی اجازت
کہ کیا کریں گے یہ خاک تینوں اگر محبت نہیں کریں گے
