شاعر:عباس تاؔبش

غزل

ٹوٹ جانے میں کھلونوں کی طرح ہوتا ہے

آدمی عشق میں بچوں کی طرح ہوتا ہے

اس لئے مجھ کو پسند آتا ہے صحرا کا سکوت

اس کا نشہ تری باتوں کی طرح ہوتا ہے

ہم جسے عشق میں دیتے ہیں خدا کا منصب

پہلے پہلے ہمیں لوگوں کی طرح ہوتا ہے

جس سے بننا ہو تعلق وہی ظالم پہلے

غیر ہوتا ہے نہ اپنوں کی طرح ہوتا ہے

چاندنی رات میں سڑکوں پہ قدم مت رکھنا

شہر جاگے ہوئے ناگوں کی طرح ہوتا ہے

بس یہی دیکھنے کو جاگتے ہیں شہر کے لوگ

آسماں کب تری آنکھوں کی طرح ہوتا ہے

اس سے کہنا کہ وہ ساون میں نہ گھر سے نکلے

حافظہ عشق کا سانپوں کی طرح ہوتا ہے

اس کی آنکھوں میں امڈ آتے ہیں آنسو تابشؔ

وہ جدا چاہنے والوں کی طرح ہوتا ہے

Ghazal

Tut Jaane Mein Khilaunon Ki Tarah Hota Hai

Aadmi Ishq Mein Bachchon Ki Tarah Hota Hai

Is liye mujh ko pasand aata hai sahra ka sukut

Is ka nashsha teri baaton ki tarah hota hai

Hum jise ishq mein dete hain khuda ka mansab

Pahle pahle hamein logon ki tarah hota hai

Jis se banna ho talluq wahi zalim pahle

Ghair hota hai na apnon ki tarah hota hai

Chandni-raat mein sadkon pe qadam mat rakhna

Shahr jage hue nagon ki tarah hota hai

Bas yahi dekhne ko jagte hain shahr ke log

Asman kab teri aankhon ki tarah hota hai

Us se kahna ki wo sawan mein na ghar se nikle

Hafiza ishq ka sanpon ki tarah hota hai

Us ki aankhon mein umad aate hain aansu ‘tabish’

Wo juda chahne walon ki tarah hota hai