Bhook
Mein bhariya tha
Mein taiz raftar khoon ashaam bhariya tha
Mere badan per
Taweel arsay se sanp ban kar
Jo bhook lapti hoi thi

Mujh ko bahut dino se wo das rahi thi
Wo rafta rafta mere badan ko nigal rahi thi

Yeh zehr mujhko
Mazeed washi bana raha
Mein bhariya tha
Ghazal thi wo

Aur us biyabaan ki wasaton ka jamal thi wo
Ab us ke baray mein kia kahon mein
Subak roi mein khud aap apni misal thi wo

Mein taak mein tha
Mein chhay dino aur saat raaton se es hussina ki ghaat mein tha

Ab es ke nazdeek aa chuka hoon
Magar wo mere badan ki mashkook
Khoon aloda boo ko patay hi dourti hai

Mein jast bharta hoon sochta hoon
Keh meri raftar se bachari
Subak roi mein agar na haari
To jeet jaye ga sanp bazi