یہ دل یہ پاگل دل مرا کیوں بجھ گیا آوارگی
اس دشت میں اک شہر تھا وہ کیا ہوا آوارگی
کل شب مجھے بے شکل کی آواز نے چونکا دیا
میں نے کہا تو کون ہے اس نے کہا آوارگی
لوگو بھلا اس شہر میں کیسے جئیں گے ہم جہاں
ہو جرم تنہا سوچنا لیکن سزا آوارگی
یہ درد کی تنہائیاں یہ دشت کا ویراں سفر
ہم لوگ تو اکتا گئے اپنی سنا آوارگی
اک اجنبی جھونکے نے جب پوچھا مرے غم کا سبب
صحرا کی بھیگی ریت پر میں نے لکھا آوارگی
اس سمت وحشی خواہشوں کی زد میں پیمان وفا
اس سمت لہروں کی دھمک کچا گھڑا آوارگی
کل رات تنہا چاند کو دیکھا تھا میں نے خواب میں
محسنؔ مجھے راس آئے گی شاید سدا آوارگی
Yeh dil yeh pagal dil mera kyun bujh gaya aawargi
is dasht mein ek shahr tha wo kya hua aawargi
 
kal shab mujhe be-shakl ki aawaz ne chaunka diya
main ne kaha tu kaun hai us ne kaha aawargi
 
logo bhala is shahr mein kaise jiyenge hum jahan
ho jurm tanha sochna lekin saza aawargi
 
yeh dard ki tanhaiyan ye dasht ka viran safar
hum log to ukta gae apni suna aawargi
 
ek ajnabi jhonke ne jab puchha mere gham ka sabab
sahra ki bhigi ret par main ne likha aawargi
 
us samt wahshi khwahishon ki zad mein paiman-e-wafa
us samt lahron ki dhamak kachcha ghada aawargi
 
kal raat tanha chand ko dekha tha main ne khwab mein
‘mohsin’ mujhe ras aaegi shayad sada aawargi
Share this with your friends