میں دل پہ جبر کروں گا تجھے بھلا دوں گا
مروں گا خود بھی تجھے بھی کڑی سزا دوں گا
یہ تیرگی مرے گھر کا ہی کیوں مقدر ہو
میں تیرے شہر کے سارے دیئے بجھا دوں گا
ہوا کا ہاتھ بٹاؤں گا ہر تباہی میں
ہرے شجر سے پرندے میں خود اڑا دوں گا
وفا کروں گا کسی سوگوار چہرے سے
پرانی قبر پہ کتبہ نیا سجا دوں گا
اسی خیال میں گزری ہے شام درد اکثر
کہ درد حد سے بڑھے گا تو مسکرا دوں گا
تو آسمان کی صورت ہے گر پڑے گا کبھی
زمیں ہوں میں بھی مگر تجھ کو آسرا دوں گا
بڑھا رہی ہیں مرے دکھ نشانیاں تیری
میں تیرے خط تری تصویر تک جلا دوں گا
بہت دنوں سے مرا دل اداس ہے محسنؔ
اس آئینے کو کوئی عکس اب نیا دوں گا
Main Dil Pe Jabr Karunga Tujhe Bhula Dunga
marunga khud bhi tujhe bhi kadi saza dunga
 
ye tirgi mere ghar ka hi kyun muqaddar ho
main tere shahar ke sare diye bujha dunga
 
hawa ka hath bataunga har tabahi mein
hare shajar se parinde main khud uda dunga
 
wafa karunga kisi sogwar chehre se
purani qabr pe katba naya saja dunga
 
isi khayal mein guzri hai sham-e-dard akasr
ki dard had se badhega to muskura dunga
 
tu aasman ki surat hai gar padega kabhi
zamin hun main bhi magar tujh ko aasra dunga
 
badha rahi hain mere dukh nishaniyan teri
main tere khat teri taswir tak jala dunga
 
bahut dinon se mera dil udas hai ‘mohsin’
is aaine ko koi aks ab naya dunga
Share this with your friends