اپنے گھر کی کھڑکی سے میں آسمان کو دیکھوں گا
جس پر تیرا نام لکھا ہے اس تارے کو ڈھونڈوں گا

تم بھی ہر شب دیا جلا کر پلکوں کی دہلیز پہ رکھنا
میں بھی روز اک خواب تمہارے شہر کی جانب بھیجوں گا

ہجر کے دریا میں تم پڑھنا لہروں کی تحریریں بھی
پانی کی ہر سطر پہ میں کچھ دل کی باتیں لکھوں گا

جس تنہا سے پیڑ کے نیچے ہم بارش میں بھیگے تھے
تم بھی اس کو چھو کے گزرنا میں بھی اس سے لپٹوں گا

خواب مسافر لمحوں کے ہیں ساتھ کہاں تک جائیں گے
تم نے بالکل ٹھیک کہا ہے میں بھی اب کچھ سوچوں گا

بادل اوڑھ کے گزروں گا میں تیرے گھر کے آنگن سے
قوس قزح کے سب رنگوں میں تجھ کو بھیگا دیکھوں گا

بے موسم بارش کی صورت دیر تلک اور دور تلک
تیرے دیار حسن پہ میں بھی کن من کن من برسوں گا

شرم سے دہرا ہو جائے گا کان پڑا وہ بندا بھی
باد صبا کے لہجے میں اک بات میں ایسی پوچھوں گا

صفحہ صفحہ ایک کتاب حسن سی کھلتی جائے گی
اور اسی کی لے میں پھر میں تم کو ازبر کر لوں گا

وقت کے اک کنکر نے جس کو عکسوں میں تقسیم کیا
آب رواں میں کیسے امجدؔ اب وہ چہرہ جوڑوں گا

apne ghar ki khidki se main aasman ko dekhunga
jis par tera nam likha hai us tare ko dhundunga
 
tum bhi har shab diya jala kar palkon ki dahliz pe rakhna
main bhi roz ek khawab tumhaare shahr ki jaanib bhejunga
 
hijr ke dariya mein tum padhna lahron ki tahriren bhi
pani ki har satr pe main kuchh dil ki baaten likhunga
 
jis tanha se ped ke niche hum barish mein bhige the
tum bhi us ko chhu ke guzarna main bhi us se liptunga
 
khwab musafir lamhon ke hain sath kahan tak jaenge
tum ne bilkul Thik kaha hai main bhi ab kuchh sochunga
 
baadal odh ke guzrunga main tere ghar ke aangan se
qaus-e-quzah ke sab rangon mein tujh ko bhiga dekhunga
 
be-mausam barish ki surat der talak aur dur talak
tere dayar-e-husn pe main bhi kin-min kin-min barsunga
 
sharm se dohra ho jaega kan pada wo bunda bhi
baad-e-saba ke lahje mein ek baat mein aisi puchhunga
 
safha safha ek kitab-e-husn si khulti jaegi
aur usi ki lai mein phir main tum ko azbar kar lunga
 
waqt ke ek kankar ne jis ko akson mein taqsim kiya
aab-e-rawan mein kaise ‘amjad’ ab wo chehra jodunga
Share this with your friends